ვერსია 2026-10-16

კონფიდენციალურობის პოლიტიკა

ეს გვერდი აღწერს, რა ინფორმაციას აგროვებს საიტი, რისთვის, ვის უჩანს და რამდენ ხანს ინახება. ის ეყრდნობა საქართველოს კანონს „პერსონალურ მონაცემთა დაცვის შესახებ“ (2023 წლის 14 ივნისი).

1. ვინ ვართ

საიტს მართავს და მონაცემებზე პასუხისმგებელია: ილია პატარაია. კითხვები, მოთხოვნები და საჩივრები გამოგვიგზავნე აქ: mafilia.game@gmail.com. მონაცემთა დაცვის ოფიცერი არ გვყავს: ჩვენი ზომის საიტს ის კანონით არ სჭირდება.

2. რას ვაგროვებთ და რისთვის

• სახელი, რომელსაც თავად წერ (შეიძლება ფსევდონიმი იყოს), და შემთხვევით შექმნილი ტექნიკური იდენტიფიკატორი. რისთვის: რომ თამაშში მონაწილეობა შეძლო.
• ანგარიში (თამაშსა და ყურებას 2026 წლის 14 ოქტომბრიდან ანგარიში სჭირდება): ელფოსტა, პაროლი (ინახება მხოლოდ დაშიფრული სახით, hash-ით, და მას ვერავინ ხედავს, მათ შორის ჩვენ), ანგარიშის სახელი, რეგისტრაციის თარიღი, წესების რომელ ვერსიას დაეთანხმე და როდის, ასევე თამაშების და მოგებების რაოდენობა, სახელის ბოლო შეცვლების დრო (24 საათში 3-ჯერ ლიმიტისთვის) და პროფილის ფოტო, თუ ატვირთავ (ვინახავთ მხოლოდ მის შუა ნაწილს, 256×256 პიქსელამდე დაპატარავებულს). თუ Google-ით შედიხარ, Google გვიზიარებს შენს სახელს და გვარს, ელფოსტას და პროფილის სურათის ბმულს (სურათს საიტზე არ ვაჩვენებთ). Supabase ანგარიშის ჟურნალში იწერს რეგისტრაციას და შესვლებს (ელფოსტა, სახელი, დრო). ელფოსტაზე ვგზავნით მხოლოდ ანგარიშის წერილებს (დადასტურება, პაროლის აღდგენის ბმული ან კოდი), რეკლამას არა; ამ წერილების ასლი რჩება გამგზავნ Gmail-ში. რისთვის: შესვლა, ანგარიშის აღდგენა, თამაშების ისტორია და წესების დამრღვევი ანგარიშის დაბლოკვა.
• ხმა და ვიდეო ლობიში და თამაშის დროს. თამაშისთვის მიკროფონი აუცილებელია, კამერა არა. ბრაუზერის ნებართვის შემდეგ მიკროფონს თამაში თავად რთავს და თიშავს წესების მიხედვით (მაგ., შენს ჯერზე). ხმა და ვიდეო რეალურ დროში მიდის ოთახში მყოფებთან. ჩვენ არ ვიწერთ და არ ვინახავთ არც ხმას, არც ვიდეოს. რისთვის: თამაში ხმით მიმდინარეობს.
• თამაშის შედეგი დასრულებული თამაშის შემდეგ: სახელი, ადგილი, როლი, გადარჩი თუ არა და როგორ გავარდი (ხმით, ღამით, ფოლებით, გასვლით), ვინ მოიგო, ოთახის კოდი, მოთამაშეების რაოდენობა, ენა, დაწყების და დასრულების დრო; ანგარიშით თამაშისას შედეგი ანგარიშზეც იწერება. რისთვის: თამაშების ისტორია, ხარვეზების და დავების გარჩევა.
• მოთამაშეზე რეპორტი: კატეგორია, ტექსტი, რომელსაც თავად წერ, ოთახის კოდი, თამაში, დღე, ეტაპი და დრო; შენი სახელი, ადგილი და ტექნიკური იდენტიფიკატორი; და იმ მოთამაშის სახელი, ადგილი და ტექნიკური იდენტიფიკატორი, ვისზეც რეპორტია; ასევე, განიხილა თუ არა ის ადმინისტრატორმა. ის, ვისზეც რეპორტია, ამის შესახებ შეტყობინებას არ იღებს. თუ ვინმე შენზე გააგზავნის რეპორტს, ეს ინფორმაცია შენზეც შეინახება. რისთვის: წესების დარღვევაზე რეაგირება.
• ბანები და გაფრთხილებები, თუ ადმინისტრატორი ანგარიშს დაბლოკავს (ბანი) ან გაფრთხილებას მისცემს. ბანი: დარღვევის მუხლი, დაწყების და დასრულების დრო, ადმინისტრატორის კომენტარი, ბრაუზერის ნიშნები (იხ. ქვემოთ), რომლებზეც ბანი ვრცელდება, და, თუ ბანი ვადაზე ადრე მოიხსნა, მოხსნის დრო და შენიშვნა. გაფრთხილება: რა წაიშალა (პროფილის ფოტო ან სახელი), ადმინისტრატორის კომენტარი, დრო და ნახე თუ არა ის. ბანს (მუხლი, დასრულების დრო, კომენტარი) და გაფრთხილებას (რა წაიშალა, კომენტარი) საიტი შენ გაჩვენებს. თუ ადმინისტრატორი ანგარიშს თვის რეიტინგიდან მოხსნის (მაგ., რამდენიმე ანგარიშით მოგებების „დაგროვების“ გამო): მოხსნის დრო და ადმინისტრატორის შენიშვნა (ეს შენიშვნა მხოლოდ ადმინისტრატორს ჩანს; შენ საიტი აჩვენებს, რომ რეიტინგიდან მოხსნილი ხარ და რატომ). რისთვის: ქცევის წესების დაცვა და განმეორებითი დარღვევის შეფასება (მოხმარების პირობები, მე-4 და მე-6 პუნქტები).
• ბრაუზერის ნიშანი. ანგარიშით შესვლისას საიტი შენს ბრაუზერში (localStorage) ერთხელ ქმნის შემთხვევით კოდს. ის არ არის მოწყობილობის ნომერი და არც ბრაუზერის „თითის ანაბეჭდი“ (fingerprint): მასში არაფერია შენს მოწყობილობაზე ან შენზე, ეს უბრალოდ შემთხვევითი რიცხვია. შესვლისას ის სერვერზე იგზავნება და ვინახავთ, რომელი ანგარიში რომელი ნიშნით შემოვიდა, პირველად და ბოლოს როდის. რისთვის: (ა) ბანი იმ ბრაუზერზეც გავრცელდეს, რომლიდანაც დაბლოკილი ანგარიში შედიოდა (ან ბანის დროს შემოვა): ასეთი ბრაუზერიდან სხვა ანგარიშიც დაიბლოკება, სანამ ბანი არ დასრულდება (საერთო კომპიუტერზე ეს ყველას შეეხება, ვინც იმ ბრაუზერით თამაშობს); (ბ) ადმინისტრატორმა დაინახოს, რომ რამდენიმე ანგარიში ერთი ბრაუზერიდან შედის (შესაძლოა, ერთი ადამიანი იყოს). ბრაუზერის (ამ საიტის) მონაცემების წაშლა ნიშანს ბრაუზერიდან შლის; ჩანაწერი ჩვენთან მე-4 პუნქტის ვადით რჩება.
• ადმინისტრატორის ჟურნალი: ადმინისტრატორის ყოველი ქმედება (ბანი და მისი მოხსნა, ფოტოს ან სახელის წაშლა, რეიტინგიდან მოხსნა და დაბრუნება, ოთახიდან გაყვანა, თამაშის დასრულება, მოთამაშის მონაცემების გახსნა, რეპორტის განხილვა, საიტის შეტყობინება) და ყოველი თამაშის უხილავი ყურება (მე-3 პუნქტი): დრო, ანგარიში, რომელსაც ქმედება ეხება, ოთახის კოდი, თამაში და დეტალები (მაგ., მუხლი, ვადა, კომენტარი, წაშლილი სახელი). რისთვის: ადმინისტრატორის ქმედებების კონტროლი და დავების გარჩევა.
• შეცდომის შეტყობინება: კატეგორია, ტექსტი, შენი სახელი (თუ ის უკვე შეიყვანე), ოთახის კოდი, გვერდის მისამართი და დრო. რისთვის: ხარვეზების გასწორება.
• IP მისამართი და ტექნიკური ჟურნალები (ბრაუზერის ტიპი, კავშირის და ანგარიშზე შესვლის დრო, შეცდომები). რისთვის: საიტის უსაფრთხოება, ბოროტად გამოყენების ლიმიტები (spam, ბევრი ოთახი ან კავშირი), წესების დამრღვევისთვის წვდომის შეზღუდვა და ხარვეზების მოგვარება. თამაშის დაწყებამდე ოთახში მყოფ ყველა მოთამაშეს შეიძლება ვაჩვენოთ, რომ ორი ან მეტი მოთამაშე ერთი ქსელიდან შემოვიდა (მხოლოდ სახელები და ნომრები, არა თავად IP), რათა გადაამოწმონ, ხომ არ არის ერთი ადამიანი რამდენიმე ანგარიშით.
• შენს ბრაუზერში (localStorage და cookie-ები): წესების დადასტურება, დახურული ოთახის პაროლი, თუ ის შეიყვანე (12 საათი), ოთახების სიის ფილტრები, ეკრანის პარამეტრები და ენა; ანგარიშით შესვლისას შესვლის cookie-ები, სანამ არ გამოხვალ, და ბრაუზერის ნიშანი (ზემოთ); პროფილზე პაროლის კოდის მოთხოვნისას შენი ელფოსტა და მოთხოვნების დრო (რომ ამ ბრაუზერიდან საათში 5-ზე მეტი კოდი არ გაიგზავნოს). თუ ადრე სტუმრად თამაშობდი, იქ შეიძლება ჯერ კიდევ ინახებოდეს მაშინდელი სახელი და სტუმრის ტოკენი (ტოკენი 24 საათში იწურება). რეკლამის, ანალიტიკის და თვალთვალის cookie-ები არ გვაქვს.
• ნებაყოფლობითი შემოწირულობა PayPal-ით ან საბანკო გადარიცხვით. გადახდას ამუშავებს PayPal ან შენი ბანკი საკუთარი წესებით. ჩვენ ვხედავთ მხოლოდ იმას, რასაც ისინი მიმღებს აჩვენებენ (მაგ., სახელი, ელ-ფოსტა ან ანგარიშის ნომერი, თანხა, დანიშნულება), და ამას ვიყენებთ მხოლოდ შემოწირულობის აღრიცხვისთვის. ბარათის მონაცემებს ვერ ვხედავთ.

სამართლებრივი საფუძველი: სახელი, ანგარიში, ხმა, ვიდეო და ოთახები საჭიროა მომსახურების მოსაწოდებლად, რომლის წესებსაც ეთანხმები. შედეგები, რეპორტები, ბანები და გაფრთხილებები, ბრაუზერის ნიშანი, ადმინისტრატორის ჟურნალი, შეცდომის შეტყობინებები, IP და ჟურნალები ეყრდნობა ჩვენს კანონიერ ინტერესს: საიტის უსაფრთხოებას, თამაშის სამართლიანობას, ქცევის წესების დაცვას და ხარვეზების გასწორებას. მონაცემებს არ ვყიდით და რეკლამისთვის არ ვიყენებთ.

3. ვის უჩანს

• ოთახში მყოფებს: მოთამაშეებს უჩანთ შენი სახელი (ანგარიშით, ლობიში შენი პროფილის ფოტოც), ესმით შენი ხმა და, თუ კამერას ჩართავ, ხედავენ შენს ვიდეოს. თამაშის დასრულების შემდეგ ოთახში ყველას უჩანს ყველა მოთამაშის როლი.
• მაყურებლებს: თამაშის დაწყების შემდეგ ოთახს მაყურებლად (მაქსიმუმ 10) შეიძლება შემოუერთდეს ნებისმიერი ანგარიშის მქონე, ვინც ოთახს სიაში ნახავს ან მის კოდს იცის; დახურულ ოთახს კი პაროლიც სჭირდება. მაყურებლებს მოთამაშეების როლები არ უჩანთ — არც თამაშის განმავლობაში და არც მის ბოლოს. მაყურებლებს ესმით და უჩანთ მაგიდა, მაგრამ თავად ვერ ლაპარაკობენ და კამერას ვერ რთავენ.
• საიტის ადმინისტრატორს: ერთი ანგარიში, ოპერატორის, რომელიც ადმინისტრატორის გვერდზე მხოლოდ ორსაფეხურიანი შესვლით (პაროლი და ტელეფონის აპლიკაციის კოდი) შედის. მას უჩანს ოთახები და ვინ ზის ან უყურებს მათში, ანგარიშის სახელი, ფოტო და რეგისტრაციის თარიღი, რეპორტები (ვინ ვისზე გააგზავნა და რა დაწერა), ბანები და გაფრთხილებები და რომელი ანგარიშები შედიოდა ერთი ბრაუზერიდან. ბანის და გაფრთხილების დეტალები მხოლოდ შენ და ადმინისტრატორს უჩანს, სხვა მოთამაშეებს არა. ადმინისტრატორს შეუძლია ნებისმიერ მიმდინარე თამაშს (დახურულსაც) უხილავად უყუროს: ის არ ჩანს მოთამაშეების და მაყურებლების სიაში, მაყურებლის მსგავსად ესმის და უჩანს მაგიდა, თავად ვერ ლაპარაკობს (მაფიის ღამის ცალკე საუბარი მას არ ესმის) და, მაყურებლისგან განსხვავებით, ხედავს ყველა მოთამაშის როლს (იმ თამაშში კი, რომელშიც თავად თამაშობს, ჩვეულებრივი მოთამაშეა და სხვების როლებს ვერ ხედავს). ყოველი ასეთი ყურება ადმინისტრატორის ჟურნალში იწერება. ხმას და ვიდეოს არც ამ დროს ვიწერთ.
• საიტის ყველა მომხმარებელს: ოთახების სიაში (ანგარიშით შესულებს) ჩანს ოთახის სახელი, მასპინძლის სახელი, მაგიდის ზომა, დაკავებული ადგილების რაოდენობა, დახურულია თუ არა და დაწყებულია თუ არა თამაში, ღიაც და დახურულიც (დახურულის პაროლი არა). ანგარიშის სახელი, რეგისტრაციის თარიღი და თამაშების და მოგებების რაოდენობა საჯაროა. პროფილის ფოტოც საჯაროა: მისი ბმულით ნებისმიერს შეუძლია მისი ნახვა. თვის რეიტინგში (ლიდერბორდი, საიტის ნებისმიერ სტუმარს, შესვლის გარეშეც) ჩანს თვის პირველი 20 მოთამაშის ანგარიშის სახელი, ფოტო, ადგილი, მოგებების და თამაშების რაოდენობა და მოგების პროცენტი იმ თვეში; ითვლება მხოლოდ თამაშები, სადაც ყველა მოთამაშე ანგარიშით იყო; რეიტინგიდან მოხსნილი ანგარიში (მოხმარების პირობები, მე-4 პუნქტი) არ ჩანს. წინა თვეების რეიტინგი ჩანს, სანამ იმ თვის თამაშის შედეგები ინახება (12 თვე). როლები და ცალკეული თამაშები რეიტინგში არ ჩანს. ელფოსტა არავის უჩანს.
• მომსახურების მიმწოდებლებს, რომლებიც მონაცემებს ჩვენი დავალებით ამუშავებენ: Vercel (საიტი), Railway (თამაშის სერვერი, ევროპა), Supabase (მონაცემთა ბაზა და ანგარიშები, ფრანკფურტი), LiveKit (ხმა და ვიდეო), Google (ანგარიშის წერილების გაგზავნა Gmail-ით, და Google-ით შესვლა, თუ მას აირჩევ), GitHub (ბაზის დაშიფრული სარეზერვო ასლი) და Cloudflare (Turnstile: რეგისტრაციის, შესვლის და პაროლის აღდგენის ფორმებზე ამოწმებს, რომ რობოტი არ ხარ; ამისთვის ხედავს შენს IP მისამართს და ბრაუზერის ტექნიკურ მონაცემებს). ყველა მათგანი აშშ-ის კომპანიაა. სადაც არჩევანი გვქონდა, ევროპული სერვერები ავირჩიეთ, მაგრამ მონაცემები შეიძლება აშშ-შიც დამუშავდეს. ეს საჭიროა იმისთვის, რომ საიტმა იმუშაოს, და ვრცელდება ამ კომპანიების მონაცემთა დამუშავების პირობები.
• სახელმწიფო ორგანოებს: მხოლოდ მაშინ, როცა ამას კანონი მოითხოვს, ან როცა ეს აუცილებელია ვინმეს სიცოცხლის ან ჯანმრთელობის დასაცავად.

4. რამდენ ხანს ვინახავთ

• ანგარიში: სანამ მის წაშლას არ მოითხოვ. წაშლის შემდეგ შენი თამაშების შედეგები ანგარიშს აღარ უკავშირდება და ჩვეულებრივი ვადით (12 თვე) რჩება მხოლოდ სახელით. ანგარიშთან ერთად იშლება მისი გაფრთხილებები, ბრაუზერის ნიშნები და რეიტინგიდან მოხსნის ჩანაწერი; ბანი თავის ვადამდე რჩება (იხ. ქვემოთ), რეპორტები და ადმინისტრატორის ჟურნალი კი ქვემოთ მითითებული ვადით.
• ანგარიშის წერილების ასლები გამგზავნ Gmail-ში: სანამ ანგარიშის წაშლას არ მოითხოვ (მაშინ მათაც ვშლით). ანგარიშის ჟურნალი (რეგისტრაცია, შესვლები): Supabase-ის ვადით, როგორც ტექნიკური ჟურნალები.
• პროფილის ფოტო: სანამ არ შეცვლი ან წაშლი (ძველი ფოტო ახლის შენახვისთანავე იშლება), სანამ მას ადმინისტრატორი არ წაშლის წესების დარღვევის გამო, ან ანგარიშის წაშლამდე.
• თამაშის შედეგები: 12 თვე, შემდეგ ავტომატურად იშლება.
• რეპორტები და შეცდომის შეტყობინებები: 6 თვე, შემდეგ ავტომატურად იშლება.
• ბრაუზერის ნიშანი ჩვენთან: ანგარიშთან — ამ ნიშნით ბოლო შესვლიდან 6 თვე, შემდეგ ავტომატურად იშლება; ბანში ჩაწერილი — ბანთან ერთად. შენს ბრაუზერში: სანამ ამ საიტის მონაცემებს არ წაშლი.
• გაფრთხილებები: 12 თვე, შემდეგ ავტომატურად იშლება.
• ბანები: დასრულებიდან 12 თვე, შემდეგ ავტომატურად იშლება. ანგარიშის წაშლა ბანს არ შლის: ის (ბრაუზერის ნიშნითაც) თავის ვადამდე მოქმედებს, რომ წაშლით და ხელახალი რეგისტრაციით ბანს გვერდი ვერ აუარონ.
• ადმინისტრატორის ჟურნალი: 12 თვე, შემდეგ ავტომატურად იშლება.
• რეიტინგიდან მოხსნა: სანამ ადმინისტრატორი ანგარიშს რეიტინგში არ დააბრუნებს, ან ანგარიშის წაშლამდე.
• ბაზის დაშიფრული სარეზერვო ასლები: 90 დღე. წაშლილი ჩანაწერი ასლში კიდევ მაქსიმუმ 90 დღე რჩება.
• IP მისამართი ლიმიტებისთვის: სერვერის მეხსიერებაში, დაახლოებით 1 საათი.
• ტექნიკური ჟურნალები: მომსახურების მიმწოდებლის ვადით (ჩვეულებრივ, რამდენიმე დღიდან რამდენიმე კვირამდე).
• ხმა და ვიდეო: არ ინახება.
• ბრაუზერში შენახული მონაცემები: სანამ თავად არ წაშლი (ტოკენი და პაროლი ზემოთ მითითებული ვადით მოქმედებს).

5. შენი უფლებები

შეგიძლია მოითხოვო ინფორმაცია იმაზე, რას ვინახავთ შენზე, და მისი ასლი, მისი გასწორება ან წაშლა, დამუშავების შეწყვეტა ან შეზღუდვა. მოგვწერე: mafilia.game@gmail.com. პასუხს გაგცემთ 10 სამუშაო დღეში (საჭიროების შემთხვევაში ეს ვადა შეიძლება კიდევ 10 სამუშაო დღით გაგრძელდეს, და ამას შეგატყობინებთ). თუ ანგარიში გაქვს, მოგვწერე იმ ელფოსტიდან, რომლითაც დარეგისტრირდი (ასე შეგიძლია ანგარიშის წაშლაც მოითხოვო). თუ ადრე სტუმრად თამაშობდი, წერილში მიუთითე სახელი, ოთახის კოდი და თამაშის თარიღი, რომ ჩანაწერი ვიპოვოთ.

თუ ფიქრობ, რომ შენი უფლებები ირღვევა, შეგიძლია მიმართო სახელმწიფო აუდიტის სამსახურს (sao.ge), რომელიც 2026 წლის 2 მარტიდან პერსონალურ მონაცემთა დაცვას ზედამხედველობს, ან სასამართლოს.

6. ასაკი

საიტი განკუთვნილია 18 წლის და უფროსი ადამიანებისთვის. თუ 18 წელზე უმცროსი ხარ, ნუ ითამაშებ. თუ გაიგებ, რომ არასრულწლოვანმა მოგვაწოდა მონაცემები, მოგვწერე და წავშლით.

7. ცვლილებები

თუ პოლიტიკა შეიცვლება, ზემოთ ვერსიის თარიღი განახლდება. მნიშვნელოვანი ცვლილებისას საიტზე შემდეგი შესვლისას ხელახლა დადასტურებას გთხოვთ.